ФЕРЕНЦИВКА

Пiддуклянскый край вдяка своïй стратеґицкий полози был все обходным i войновым путём. У 20 столитю в тым краю пробигали тоты найвекшы боï в рамках двох свiтовых воєн, по котрых в краю зистал великый почет памятникив и теметовив. В скоршых столитёх краём переходили войска Кутузова, Ребиндера, Морозинского и другых. На єднодухшый переход войск и воєнской техникы были потрiбны добры и утримуваны драгы, котры ся ставляли главнi в кризовых часох а то з двох доводiв – грозили войны або воєнскы конфликты а в тым часи был нарiд у великий бидi, прото владнуча елита мусила дати людём даяку роботу, можливисть заробити даякы грошы, бы миджи народом не взникали взбуры.
Эднов з такых драгох была и миджи нашыма людьми называна Ференцивка (котра ся дiлит на дви части: Йозефинка и Терезиянка), котра спаяла Земплин и Шариш з Ґалициёв. В минулости была Ференцивка найрушнiша драга в реґiёнi, коло котрой ся находило велё корчмох, но и перепрягаче мисце у селi Мероля, де была конярня, фурманска корчма, сельчане оправували подорожнiм возы, лици...
До гнесь ся у наший доправнiй ситi выужывают части поводной драгы. Заховали ся и в сучасности мало або и цалком невыужываны части котры сут туристами барз мало выгледуваны а то главнi з доводу малой пропаґациï. В минулых десятьричох их наприклад обывателе Крайной Поляны, Бодружалю, Прикры и Меролi выужывали як драгу на одпуст на Букову Гiрку.
Ференцивка (Йозефинка) є драга будувана за пануваня Йозефа ІІ. в рокох 1780 – 1790. Терезiянка є єй часть котра была будувана иши за часив пануваня Марiï Терезиï. Сучасна драга з Дуклi по Крайну Поляну є нова, вытворена у другий половинi 20 столитя. З Крайной Поляны по Мерольске «Роздiля» є на поводнiй камянiй дрази положеный асфалт а драга ся выужыват як драга другой катеґорiï. На Мерольским «Роздiлю» (з Роздiля ся иде долов до Меролi i долов до Бодружалю), коло креста треба одбочити на право на стару рiвну заховану Йозефинку, пiд котров ся находит хранена область Мерольска слатина. Драга веде через болото на скриз через дебру (роклина). За дебров веде драга рiвно, через сидло аж до долины Кожухивского потока а одты аж по асфалтову драгу миджи селами Ґрибiв и Кожухивци. Поводна драга є пiд асфалтовов драгов по Ґрибiв, де за мостом направо покрачує знова камяна драга котра веде коло Буковой Гiркы – знамого одпустового мисця, бывалого василиянского монастыря, центра освiты (школа, книжниця) i културы. По прудшым клесаню ґу драги миджи Букiвцям и Вишавков драга веде ґу Хотчанскому потоку, котрый был в минулости границёв миджи Шаришом и Земплином. Дале є Терезиянка покрыта асфалтом а веде через Хотчу аж до Стропкова.
Цилём написаня того чланку не є подати пресный попис, буду рад кидь дахто придаст ґу нёму даякы подрiбнiшы додаткы, но каждый найлипше зробит, кидь ся даст иншпирувати на интересну туру красным руснацкым краём, ци уж на пише або на бициґлю, а сам увидит тоту красоту и тихоту.

Zdieľať na Facebooku

Dneska je nediľa

16. jun 2019


Юліаньскый календарь:

3.юн 2019

Mapa registrovaných používateľov Holosy.sk

Písanie dokumentov po rusínsky pomocou OpenOffice

Písanie rusínskou cyrilikou v systéme Windows 7

Ako modifikovať Firefox, aby kontroloval rusínsky pravopis

Posl´idn´i komentar´i

Banner pre vaše stránky

Budeme radi ak Holosy spropagujete aj na vašich stránkach pomocou reklamého bannera.

Komunitný portál karpatských Rusínov

V prípade záujmu o výmenu bannerov, nás kontaktujte.