Писаня русиньсков кіріліцёв в сістемі Windows 7

Першов з них є мнов вытворена русиньска клавіатура. Працює на сістемах Windows XP, Vista, 7, 8 і новшых. Найдете на нїй вшыткы буквы русиньской кіріліцї з тым, же буквы Ё і Ъ мож написати лем комбінаціов правый клавіш Alt + О і Ь (твердый знак тыж на шпеціалнім клавішу, котрый але не мають вшыткы клавіатуры). Окрем того на нїй приданы дакотры тіпоґрафічны сімболы, напр. поправный апостроф (’), різны тіпы уводзовок («, », „, “, ”), знак україньской гривны (₴) і другы. Тоты знакы під комбінаціами з правым клавішом Alt, в припадку дакотрых іщі до того з клавішом Shift. Навыше тота клавіатура підпорує вшыткы сучасны словяньскы языкы хоснуюыі кіріліцю з можливостёв писаня акцентів над гласныма і молдавску кіріліцю. В архіві приложена тыж документаціа з подрібным пописом клавіатуры і іншталації написана по русиньскы кіріліцёв в суборї InfoCyr.html і в міджіславяньскім языку латиніцёв в суборї InfoLatMS.html. Клавіатуру можете стягнути ту: http://www.tyflonet.com/siciliano/kbdrueqy.zip (варіант QWERTY/ЯШЕРТИ) або http://www.tyflonet.com/siciliano/kbdrueqz.zip (варіант QWERTZ/ЯШЕРТЗ).

Друга клавіатура має назву „Russian Translit Latin“ і є заложена на руській фонетічній клавіатурї з проґраму Fontboard. Має барз подібны можливости до русиньской клавіатуры, но єй розложіня ся од нїй часточнї різнить і підпорує дакус більше сімболів. Стягнете єй під тым одказом: http://www.tyflonet.com/siciliano/kbdrutrl.zip Єй схему найдете ту: http://kbd-intl.narod.ru/layouts#ru-trl

Про тых з вас, котры хоснують руську або україньску клавіатуру, іщі прикладам одказы на дві клавіатуры з руськым і україньскым розложінём підпоруючі русиньску кіріліцю. Сторінкы панисаны по руськы.
Клавіатура „СВК“ (к діспозіціі в руській і україньскій верзіі): http://www.svk.pp.ua/ru/raskladki-klaviatury
Руська меджинародна клавіатура (підпорує вшыткы сучасны языкы хоснуючі кіріліцю): http://kbd-intl.narod.ru/ru

Іншталаціа (окрем першой клавіатуры):
По стягнутю і розпакованю архіву клікнийте в выниклім прьєчінку на субор Setup.exe (в припадї клавіатуры Russian Translit Latin на субор KBDRUTRL.exe). По наіншталованю бы сьте мали мати клавіатуру такой придану, также стачіть стиснути Alt+Shift. Русиньска клавіатура прираджена к україньскому языку, вшыткы далшы клавіатуры прираджены к прислушному языку подля назвы. З вынятком Руськой меджинародной клавіатуры найдете в архівах окрем іншталаційных суборів жрїдловы суборы во форматї klc, котры мож отворити в проґрамі Microsoft Keyboard Layout Creator і дале клавіатуры модіфіковати. Жрїдловый субор Руськой меджинародной клавіатуры к стягнутю під самостатным одказом.