Невиноваты

В ночі на 20-го октобра появили ся в Закарпатьскій области Україны білборды. Ніт, не пропоновали ани туньше телефонованя, ани ліпшу пожычку в банці. Свідчіли о тім, де веде політіка Києва в тій области.
-

Двадцять білбордів, як писали україньскы медії, на котрых были фотоґрафії трьох політіків мадярьской меншыны, давалo ясный одказ: Заставиме сепаратістів! Шкандал, і думам, же є то іщі слабе слово, коментовав міністер загранічных діл Україны Павло Клімкін, ці голова Закарпатьской областной адміністрації Геннадій Москаль, котрый за білбордами видів російску безпеку ФСБ. Вшыткы мыють рукы, говорить ся о тім, же білборды были зроблены нелеґално, не є виноватого, окрім російской безпекы.
-
О пару днів по тім в рамках Варшавского безпечностного форуму міністер загранічных діл Мадярьска Петер Сіярто пропонує Павлови Клімкінови договор о охороні народностных меншын і говорить о тім, же довіра меджі тыма двома державами мусить быти обновлена. Пропонують ся і грошы на будованя драг в Закарпатьскій области Україны. За думками Сіярта є в інтересах Будапешту, жебы конфлікт далше не продовжовав. Київ обіцять пороздумовати над пропозіційов.
-
Меджі тыма подіями, котры за остатній час одбыли ся, і котры суть повязаны із Закарпатьсков областьов, Карпатьска січ публічно запрошує на свої планованы події, їй представителі пошырюють на своіх профілах на сіті Facebook різны фотоґрафії стріч, походів. Фотоґрафії, на котрых мають членове закрыту тварь, бігають зо збройов і „тренують“ молодых людей, фотоґрафії, котры нияк не різнять ся од фотоґрафій іншых неонацістічных ґруп будьде в Европі. З тов різніцьов, же в Европі суть такы орґанізації мімо закона, на Україні Карпатьску січ офіціално лем одзброїли.
-
Не думам, же якыйсь договор, котрый теперь пропонує Будапешт, быв зробленый із дня на день, но думам, же його публікованя могли ускоріти і остатні події на Україні – головно споминаны білборды. І пропозіція договору о охороні народностных меншын є правилна. Бо як раз справованя ся Україны односно народностных меншын є жрідлом того, што видиме в остатнім часі. Про мене в тім моменті не є основным, хто конкретно стоїть за шкандалозныма білбордами, основным є задумати ся, хто тому приготовив уроджайну землю, жебы то мож было схосновати.
-
Тоту уроджайну землю довгодобо приготовлює як раз політіка Києва. Неберучі до увагы теперь цілу теріторію Україны, а лем Закарпатьску область, є справованя ся державы в области народностных меншын далеко од будьякых европскых штандардів. Докінця таке справованя ся не є лем в области народностных меншын, бо задумати ся треба обще над характером державы і над тым, ці то є правна держава.
-
Приклады суть знамы і стораз повторяны. Україна предці зачала свою путь в рамках Закарпатьской области переступліньом властных норм і приобіцянь, кедь по успішнім референдумі не выповнила волю народа на автономію. Київ сістематічно продовжовав у ничіню русиньской народности продовжованьом насилной українізації, непризнаньом прав Русинам. По боротьбі із Русинами пустив ся до далшых меншын, в Закарпатьскій области Україны до Мадярів. Припомяньме собі, же „проблемы“ не зачали роздаваньом мадярьскых паспортів і відеозаписом із конзулату. Тото вшытко зачало атаками на канцеларії мадярьскых політіків, побігованьом Карпатьской січі по закарпатьскых уліцях, пропозіціями тіпу, же треба уліцю войнового злочінця Шухевіча (найновіше уж треба в Ужгороді і уліцю Бандеры), продовжовало языковым законом ці законом о освіті.
-
І так ся вертаме ку вопросу, хто за білбордами стоїть. Білборды суть ефект засіяного. Білборды суть лем насіня, котре ся ухопило і теперь вказало зо землі. Но сіяв Київ і порядно гноїв тоту землю, жебы быв уроджай, дакілько років і многыма способами. І є абсолутно єдно, хто конкретно білборды зробив, бо условії на то зробив хтось іншый.
-
Покля хоче Україна заборонити такым і подобным шкандалам, котры бы могли быти путьов до „аду“, потім і без мадярьской пропозіції, і без довгого роздумаваня мав бы Київ переоцінити і змінити політіку односно народностных меншын. Вшыткых. І той невызнаной. Треба орґанізації як Карпатьска січ, котры самы страшать людей і роздувають іскеркы небезпечного огня націоналізма, поставити мімо закон і будьякы актівности такых радікалів безпрецедентно карати, намісто прославляня їх як добрых патріотів.
-
Треба перестати грати ся на невиноватого, перестати глядати виноватых всядыль інде лем не у себе, і прияти зодповідность за тото, што діє ся в державі. Покля тото Київ не змінить, потім є тот найвиноватішый.
-
Статя была написана як коментарь „Вступне до контроли“ лемківского радія lem.fm.
-
Петро Медвідь

Zdieľať na Facebooku

Русиньска бісїда - Чет

Русиньска бісїда - Чет

Та што або як?

Drabinka - najkrajšie ľudovky z východu

Здружіня інтеліґенції Русинів Словеньска

Радіо про вшыткых Русинів

Лемківске інтернетове радіо

Вікіпедія в русиньскім языку

Вікіпедія в русиньскім языку

У русиньскій верзії є теперь 2837 статей.

Писаня русиньсков азбуков

Камаратьскы сторінкы

Академія русиньской културы в СР

Rusínsky festival Svidník

Ľudová hudba Ondreja Kandráča

Portál slovenskej ľudovej hudby, Internetový obchod s ľudovou hudbou, vydavateľstvo VideoRohal

ZIRS – sekcia molodi.Rusiny

kaviareň a knihkupectvo

Farnosť Stropkov-Bokša

Rusnaci u Panoniji

Ruska Tube

Rusíni.cz - rusínská iniciativa v ČR

Společnost přátel Podkarpatské Rusi

Выберте собі языкову мутацію

Dneska je četver

15. november 2018


Юліаньскый календарь:

3. новéмбер 2018

Мапа реґістрованых хоснователїв Holosy.sk

Писаня документів по русиньскы з Openoffice

Писаня русиньсков кіріліцёв в сістемі Windows 7

Як модіфіковати Firefox, жебы контролёвав русиньскый правопис

Posl´idn´i komentar´i

Баннер про вашы сторінкы

Будеме рады як Голосы спропаґуєте на вашых сторінках через рекламный баннер.

Комунітный портал карпатьскых Русинів

Як бы сьте хотїли вычеряти банеры, контактуйте нас.